ಇಲ್ಲದ ತೆಲ್ಲವ್ ಬೊಕ್ಕ ಬಸ್ ಸ್ಟಾಫ್ ದ ವಿಶ್ವನಾಥೆ

ಪುಲ್ಯ ಕಾಂಡೆ ಬೇಗ ಲಕ್ಕುನಿ ಪಂಡ ಅವ್ವ್ ಪನೀತ್ ಬಂಗನೆ ಇತ್ತೆ,ಚಳಿ ಜಾಸ್ತಿ ಆದ್ ಪಿದಯಿಡ್ ಚಿಮ ಗಾಳಿ ಬೀಜ್ ನಗ ನನಾತ್ ಕೊಟ್ಟು ಪಾರ್ದ್ ಜೆಪ್ಪುಗ ಪಂದೇ ಆಪುಂಡು. 

ಅವ್ವ್ ಲ ಬೇತೆ ವಾರ ಪುರ ನಿದಾನ ಡ್  ಪರತೊಂದು ಪೋದು ಇತ್ತ್ಂಡಲ ಅಯ್ತಾರ ಒಂಜಿ ದಾಯೆಗ್ ಆತೊಂಜಿ  ಬೇಗ ಕರೀದ್ ಸೋಮಾರ ಪಾರೊಂದು ರಾವೊಂದು ಬರ್ಪುಂಡಾ ಪಂದ್ ಗೊತ್ತಾಪುಜಿ.

ಅಮ್ಮೆರ್ ಒಂಜಿ ಬೇಗ ಲಕ್ಕುವೆರ್.ದಾಯೆಗ್ ಆತ್ ಬೇಗ  ಲಕ್ಕುವೆರಾ ಮರ್ರೆ.ಅರೆನ ಬೇಲೆ ಕಾಂಡೆ ಬೇಗ ಲಕ್ಕದ್  ತೆಲ್ಲವ್ ಮಲ್ಪಿನ.ಪೇಪರ್ ದಾತ್ ತೆಲ್ಪುದ ತೆಲ್ಲವ್. ಆರ್ ಒಂಜಿ ಮಲ್ಲ ತೆಲ್ಲವ್ ಎಕ್ಸ್ಪರ್ಟ್ ಆದ್ ಎಂಕ್ಲೆನ ಇಲ್ಲಡ್ ದಿನಾಲ ಅವ್ವೇ.ಆಂಡ  ಅಮ್ಮಗ್ ಲ ಒಂತೆ ಪನೀತ್ ಸಹಾಯ ಲ ಆಪುಂಡು.ಅಮ್ಮಗ್ ಅಮ್ಮನ ಬೇಲೆ ಇಪ್ಪುಂಡು,ಪೆತ್ತದ ಪೇರ್ ಬೊರಿಪಿನ, ಕಿದೆ ಸ್ವಚ್ಛ ಮಲ್ಪಿನ,ಚಾ ಮಲ್ಪಿನ, ಪಾತ್ರೆ ದೆಕ್ಕುನ ಪುರ. 

ಅಮ್ಮೆರ್ ನ ತೆಲ್ಲವ್ ಮುಗಿದ್ ಆನಗ, ಯಾನ್ ಲಕ್ಕೊಡೆ, ಇಜ್ಜಿಂಡ ಅಟಿಲ್ ದ ಕೋಣೆರ್ದೇ "ಆಯೇ ಗೋನೆ ನನ ಯೇತ್ ಜೆಪ್ಪುವೆ, ಬೇಲೆ ಗ್ ಪೋವರೆ  ಪೊರ್ತ್ ಆತಿಜಾ..ಅತ್ತ್ ಡೋಲು ಬ್ಯಾಂಡ್, ಕೊಂಬು ಮಿನಿ ಬೋಡುಗೆನಾ.. " ಪನ್ಪಿನ ಆರೆನ ಒಂಜಿ ಪಿರಿಪಿರಿ ಞಕ್ಕ್ ಞೈ ಇಪ್ಪುನಗ ಯಾನ್ ದಿನಾಲ ಮೊಬೈಲ್ ಡ್ ಅಲರಾಂ ದಿವೊಡ್ ಪಂದೇ ಇಜ್ಜಿ. ಬುಡ್ಲೆ ಮರ್ರೆ ಒಂಜಿ ಪತ್ತ್ ಮಿನಿಟ್ ಜೆಪ್ಪುವೆ ಪಂಡಲ ಬುಡ್ಪುಜೆರ್. 

ತೆಲ್ಲವ್ ಗ್ ಓರೋರ ಅಮ್ಮ ತಾರಯಿದ ಚಟ್ನಿ ಕಡೆವೆರ್, ಇಜಿಂಡ ದುಂಬುದ ದಿನದ ಬಂಗುಡೆದ ಗಸಿ ಇಪ್ಪುಂಡು. ನಮಕ್ ರಡ್ಡ್ ಲ ಇತ್ತ್ಂಡ ರಡ್ಡ್ ಲ ಬೋಡೆ, ಫಸ್ಟ್ ಗ್ ಫ್ರೆಶ್ ಚಟ್ಟಿ ಡ್ ರಡ್ಡ್ ತೆಲ್ಲವ್ ಬೊಕ್ಕ ದುಂಬುದ ದಿನತ ಬಂಗುಡೆ ಗಸಿ ಟ್ ನಾಲ್ ತೆಲ್ಲವ್ ತಿಂಡ ಯೆನ್ನ ಕಾಂಡೆದ ಒಂಜಿ ತಿಂಡಿ ತಿಂದಿ ಲಕ ಆಪುಂಡು.ಬೊಕ್ಕ ಇಲ್ಲರ್ದ್ ಪಿದಡೊಡೆ. 

ಬಸ್ ಸಾಫ್ಟ್ ಗ್ ಬತ್ತಂಡ ಲೀಲಕ್ಕ,ಸುರೇಶಣ್ಣೆ, ವಿಶ್ವನಾಥೆ ಪುರ ಅಲ್ಪ  ಇಪ್ಪುವೆರ್.. ಅಕ್ಲೆನಲ ಒಂಜಿ ಞಕ್ಕ್ ಞೈ ದಿನೋಲ ಇಪ್ಪುಂಡೆ, ವಿಶ್ವದ  ಪುರ ವಿಷಯ ಲ ಅಕುಲು ಮೂಜಿ ಜನಕ್ ಗೊತ್ತುಂಡು, ದೇಸೋಡು ಕೋರೋನ ಬತ್ತ್ಂಡ್ ಪಂದ್ ಎಂಕ್ ಫಸ್ಟ್ ಗ್ ಪಂತಿನಿಲಾ ಅಕುಲೆ. ಪಾತೆರ್ರೆ ದಾಲ ತಿಕ್ಕಿಂಜಿಡ ಲಾಸ್ಟ್ ಗ್ ಅಕುಲು ಅಕುಲೆ ಕೆನುನು.. ಅಂದೆಯೇ ಲೀಲಕ್ಕ ಇರೆಗ್ ದಾದೆ ಅಡ್ಡೆಯೇ ಇನಿ ಪಂದ್.. ಅಪಗ ಆರ್ ಗೆಂಡದಡ್ಡೆ,ಸೇಮೆದಡ್ಡೆ, ಪಾತ್ರೊಡ್ಡೆ ಅಂಚಿತ್ತಿನ ಒಂತೆ ಮಲ್ಲ ತೂಕದ ಅಡ್ಡೆನೆ ಪನ್ಪಿನಿ. ಬೊಕ್ಕ ಲೀಲಕ್ಕ ಸುರೇಶಣ್ಣಡ ಕೇನುವೆರ್.. ಸುರೇಶಣ್ಣ ಇರೆಗ್ ದಾದೆಯೆ ಚಾತ ಬಾಯಿಗ್ ಪಂದ್.. ಅರ್ ಲ ಮಲ್ಲ ಮಲ್ಲನೆ ಬುಡ್ಪೆರ್.. ಕೋರಿ ರೊಟ್ಟಿ, ಕೊಪ್ಪ ರೊಟ್ಟಿ, ಮೂಡೆ, ಗುಂಡ ಪುರ. ಕಡೆಕ್ ರಡ್ಡ್ ಜನಲ ಸೇರ್ದ್ ಎಂಕ್ ಕೇನುವೆರ್.. ಅಂದಂಬೆ ಪಚ್ಚು ನಿಕ್ಕ ದಾದಂಬೆ ಕಾಂಡೆ ತಿನರೆ ಪಂದ್. ಯೆನ್ನ ಎಪಲ ಮಸ್ತ್ ಹಗುರದನೆ.. ಅವ್ವೇ ತೆಲ್ಲವ್ ಪಂದ್ ಪನ್ಪೆ. ಯಾನ್ ತೆಲ್ಲವ್ ಪಂದ್ ಪಂಡಿ ಕೂಡ್ಲೆ ಅದ ಮುಟ್ಟ ಮನಿಪಂದೆ ಇತ್ತಿನ ವಿಶ್ವನಾಥೆ ಜೀವ ಆಪೆ... ಯೆಬೆ ಇಂಬಗ್ ಏಪಲ ತೆಲ್ಲವೇ.. ಪಂದ್ ಆಯೆ ಒಂಜಿ ಗರ್ನಲ್ ದಕ್ಕುವೆ.ಆಯೆ ಒರಿ ಮಲ್ಲ ಆಕ್ಲೆನ ಇಲ್ಲಡ್ ಏಪಲ ಮಸಾಲೆ ದೋಸೆ ತಿನ್ಪಿಲಕ  ಮಲ್ಪುವೆ. 

ಆಪಗ ಯಾನ್ ಆಕ್ಲೆಗ್ ತೆಲ್ಲವ್ ದ ಮಹತ್ವದ ಬಗ್ಗೆ ಪನೀತ್ ಪನ್ಪೆ. ತೆಲ್ಲವ್ ಒಂಜಿ ಕಾಲದ  ಬಡವೆರ ಬಂದು.. ಕಡಿಮೆ ಸಾಮಾನ್ ಡ್ ಮಲ್ಪರೆ ಆಪಿನ ಒಂಜಿ ಅಡ್ಡೆ ಅವ್ವ್. ಅವೆನ್ ನಮ ಏಪಲ ಚಲ್ಲ್ ಮಲ್ಪರೆ ಬಲ್ಲಿ.. ಸಸಾರ ಮಲ್ಪರೆ ಬಲ್ಲಿ,ತೆಲ್ಲವ್ ಮಾತೆರೆಗ್ಲ ಮಸ್ತ್ ತೆಲ್ಪು ಆದ್ ಮಲ್ಪರೆಲ ಬರ್ಪುಜಿ.. ಅಯ್ಕ್ ಎನ್ನ ಅಮ್ಮೆರ್ ಲಕ ಮಸ್ತ್ ಟ್ಯಾಲೆಂಟ್ ಬೋಡು ಪಂದ್ ಪನ್ಪೆ. 

ಅಪಗ ಕುಡೊರ ವಿಶ್ವನಾಥೆ ಜೀವ ಆಪೆ.. ಯೆಬೆ.. ನಿಕ್ಲೆನ ಇಲ್ಲಡ್ ಅಮ್ಮೆರ್ ತೆಲ್ಲವ್ ಮಲ್ಪಿನ ಪಂದ್.. ಕುಡೊಂಜಿ ಕದೊನಿ ಪಾರವೆ ಆಯೆ. ಆಯೆ ಇಂಚಿನ ಪ್ರಶ್ನೆಲೆನ್ ಮಾತ್ರ ಕೇನರೆ ಆ ಬಸ್ ಸ್ಟ್ಯಾಂಡ್ ಗ್ ಬರ್ಪಿನಿ, ಬೊಕ್ಕ ಬಾಕಿದ ಟೈಮ್ ಡ್ ಮೊಬೈಲ್ ಡ್  ಮುರ್ಕುದು ಸೈಯೊಂದು ಇಪ್ಪುವೆ.. 

ಅಂದ್ ಅಯ್ಟ್ ದಾದ ಉಂಡು,ಅಂಜೊವು ಲ ಅಡಿಗೆ ಮಲ್ಪುವೆರ್.. ನಳ ಮಹಾರಾಜ, ಭೀಮ ಸೇನ ಮೊಕುಲೆನ ಕಥೆ ನಿಕ್ಲೆಗ್ ಗೊತ್ತಿಜ್ಜಾ..ಪಂದ್ ಯಾನ್ ಪನ್ಪೆ. 

ಅಪಗ ಲೀಲಕ್ಕ ಮಂಡೆ ಕಿರೆತೊಂದು  ಪನ್ಪೆರ್.. ಭೀಮಸೇನೆ ಪಂಡ ಆಟ ಡ್ ಪುರ ಮಲ್ಲ ಗದೆ ಪತೊಂದು ಬರ್ಪುನಾಯೆ ಅತ... ಆಂಡ ಆಯೆ ನಳೆ ಏರ್ ಪಂದ್ ಗೊತ್ತಾಯಿಜಿ.. 

ಅಂದಾ.. ಅಯ್ಕ್ ದಾಯೆಗ್ ಟೆನ್ಶನ್.. ಆಯನ ಕಥೆ ಯಾನ್ ಪನ್ಪೆ ಪಂಡಾ..ವಿಶ್ವನಾಥೆ ಕೂಡ ಜೀವ ಆಪೆ...ನಿನ್ನ ಕಥೆಗ್ ತೂ ಬೂರಡ್... ತುಲ ಬಸ್ ಬತ್ತ್ ಆಂಡ್.. ಹಹ್ಹಾ.. ಹಹ್ಹಾ.. 

ಬಸ್ ಡ್ ಕುಲ್ಲೊಂದು  ಪೋನಗ ಗುರ್ತದ  ಕಂಡಕ್ಟರ್ ನವೀನೆ ಕೆನರೆ ಉಂಡು.. ಪಚ್ಚು ಬ್ರೋ.. ಕಾಂಡೆದ ತಿಂಡಿ ಆಂಡಾ... ದಾದ ಇತ್ತ್ಂಡ್ ಇನಿ ತಿನರೆ ಪಂದ್. ಆಪಗ ಯಾನ್ ತೆಲ್ವವ್ ಪಂಡ... ಯೆನ್ನ ಬರೀಟೆ ಕುಲ್ಲುದಿನ ವಿಶ್ವನಾಥೆ ಜೋರುಡೆ ಪನ್ಪೆ..ಆಯಡ ತಿಂಡಿ ಪುರ ದಾದ ಪಂದ್ ಕೆನೋಡ್ಚಿ.. ಆಯಗ್ ಯಾಪಲ ತೆಲ್ಲವೇ..

ಬಸ್ ದುಂಬು ಪೋಪುಂಡು... ಯಾನ್ ಆಲೋಚನೆ ಮಲ್ಪುನಿ.. ನನ ಮೊಕುಲು ಪುರ ತಿಂಡಿ ದಾದ ಪಂದ್ ಕೇನುನಗ ಯಾನ್ ಮಸಾಲೆ ದೋಸೆ, ಪರೋಟ, ಇಡ್ಲಿ ವಡೆ..ದಹಿ ವಡಾ.. ಪಂದ್ ಸುಳ್ಳಾಂಡಲ ಪನೋಡ್ ಪಂದ್.

ಆಪಗಲ ವಿಶ್ವನಾಥೆ ಅಯ್ಕ್ ಲ ದಾದಂಡಲ ಖಂಡಿತ ಮುಕ್ಕಾಲ್ ದಕ್ಕುವೆ ಮಾರಿ... 

.....................................................................................

#ಉರಲ್_ಕುರಲ್ 🐃🌾

(ಉರಲ್ ಪಂಡ ಕಂಡ ದಪ್ಪುನಗ ಎರುಕ್ಲೆನ್ ನಾಯರ್ ಗ್  ಕಟ್ಟೊಂದು ಕಂಡ ದಪ್ಪುನಾಯೆ ಪಿರವುಡ್  ಪನೊಂದು ಪೋಪಿನ ಒಂಜಿ  ರಾಗೋ.. ಅಂಚನೆ ಕುರಲ್(ಕೊರಲ್)ಪಂಡ ನಮಕ್ ಮಾತ ಗೊತ್ತಿಪಿನ ಅವ್ವೆ ಕಂಡದ ಬಂಗಾರ್ದಂಚಿನ ಕುರಲ್. ಉಂದು ರಡ್ಡ್ ಪುದರ್(ಉರಲ್ - ಕುರಲ್) ಈ ಆಲ್ಪಂ ಗ್ ದೀದ್... ಅಪ್ಪೆ ಭಾಷೆ ಕಮ್ಮನೆದ ತುಳು ಟ್ ಲ ನಿರಂತರವಾದ ಬರೆಯೊಂದು ಪೋವೊಡು ಪಂದ್ ಒಂಜಿ ಆಸೆ, ಏಪದ ಲಕನೆ ಮೋಕೆ ಇಪ್ಪಡ್☺️🙏) 

#ಪಚಂತು_ಬೆದ್ರ

(abpacchu)