ಕಡಲ್ದ ಬರಿತ ಪಿಚ್ಚರ್ಗ್ ಇತ್ತೆ ಬರ್ತಿ ಐವ್ವ ವರ್ಷದ ಸಂಬ್ರೊಮ..

 

ನಮ್ಮ ತುಳು ಭಾಷೆಡ್ ಪಿಚ್ಚರ್ ಬತ್ತ್ ದ್ ಫೆಬ್ರುವರಿ 19,2021 ಗ್ ಬರ್ತಿ ಐವ್ವ ವರ್ಷ ಆಪುಂಡು.ಉಂದು ನಮ್ಮ ಮೋಕೆದ ತುಳು ಚಲನಚಿತ್ರ ರಂಗಗ್ ಒಂಜಿ ಐತಿಹಾಸಿಕ ಕ್ಷಣ ಪಂದೇ ಪನೊಲಿ. 

ತುಳು ಭಾಷೆದ ಸುರುತ ಪಿಚ್ಚರ್  ಒವ್ವ್ ಪಂಡ ಅವ್ವ್ " #ಎನ್ನ_ತಂಗಡಿ.." . ಈ ಪಿಚ್ಚರ್ ದ ಹೀರೋ ಅಂಚನೇ ತುಳುತ ಸುರುತ ಹೀರೋ ಪನ್ಪಿನ ಮಾನದಿಗೆ  ಅವ್ವ್ "ಆನಂದ ಶೇಖರ್" ಬೊಕ್ಕ ತುಳುತ ಸುರುತ ಹೀರೋಯಿನ್ ಪನ್ಪಿನ ಮಾನದಿಗೆ "ಹೇಮಲತಾ" ಮೊಕ್ಲೆಗ್ ರಡ್ಡ್ ಜನಕ್ ಸಂದುಂಡು. ಎಸ್. ಆರ್ ರಾಜನ್ ಪನ್ಪಿನಾರ್ ಉಂದೆನ್ ನಿರ್ದೇಶನ ಮಲ್ತದ್ ಇತ್ತೆರ್. ಉಂದು ಪಿಚ್ಚರ್ ನ್ 1970 ಡ್ ಮಲ್ಪರೆ ಸುರು ಮಲ್ತದ್,1971 ಡ್ ಮುಗಿಯುಂಡು.ನಮ್ಮ ಜ್ಯೋತಿ ಟಾಕೀಸ್ ಡ್ ಫೆಬ್ರುವರಿ 19 ಗ್ ಉಂದು ಬಿಡುಗಡೆ ಆದ್ ಇತ್ತಂಡ್.ಈ ವರ್ಷದ ಫೆಬ್ರುವರಿ 19,2021 ಗ್ ಸರಿಯಾದ  ಈ ಪಿಚ್ಚರ್ ಗ್ ಐವ್ವ ವರ್ಷ ಆಪುಂಡು.ತುಳು ಪಿಚ್ಚರ್ ದ ಅಭಿಮಾನಿಲೆಗ್ ಲ ಉಂದು ಒಂಜಿ ಕುಸಿತ  ವಿಷಯನೇ ಸರಿ. 

ಸುರುತ ಪಿಚ್ಚರ್ "ಎನ್ನ ತಂಗಡಿ" ಆಯಿ ಬೊಕ್ಕ ಅವ್ವೇ ವರ್ಷ ಕೆ.ಎನ್ ಟೈಲರ್ ಮೆರೆನ "ದಾರೆದ ಬುಡೆದಿ " ಬತ್ತ್ಂಡ್. ಉಂದು ನಮನ ತುಳು ಚಿತ್ರರಂಗದ ರಡ್ಡನೇ ಪಿಚ್ಚರ್.

ಅವ್ವ್ ಆಯಿ ಬೊಕ್ಕ "ಬಿಸತ್ತಿ ಬಾಬು" 1972 ಡ್ ಬತ್ತ್ಂಡ್. ಉಂದು ರಾಜ್ಯ ಪ್ರಶಸ್ತಿ ಪಡೆಯಿನ ಸುರುತ ತುಳು ಪಿಚ್ಚರ್.

1973 ಡ್ "ಕೋಟಿ ಚೆನ್ನಯ" ಪಿಚ್ಚರ್ ಬತ್ತ್ಂಡ್. ಉಂದು ಸುರುತ  ಪೌರಾಣಿಕ ಕಥೆದ ಪಿಚ್ಚರ್. 

1978 ಡ್ "ಕರಿಯಾನಿ ಕಟ್ಟಂದಿ ಕಂಡನಿ" ಪನ್ಪಿನ ಸುರುತ ತುಳು ಕಲರ್ ಪಿಚ್ಚರ್ ಬತ್ತ್ಂಡ್. 

1993 ದ "ಬಂಗಾರ್ ಪಟ್ಲೆರ್" ಪಿಚ್ಚರ್ ಸುರುತ ಮಸ್ತ್ ರಾಷ್ಟ್ರೀಯ ಬೊಕ್ಕ ಅಂತರಾಷ್ಟ್ರೀಯ ಪ್ರಶಸ್ತಿ ಪಡೆಯಿನ ತುಳು ಪಿಚ್ಚರ್.

ಇಂಚನೆ ಆಯಿ ಬೊಕ್ಕ ಒಂಜೊಂಜಿ ತುಳು ಪಿಚ್ಚರ್ ಬರ್ರೆ ಸುರು ಆಂಡ್. ಆಂಡ ತುಳು ಪಿಚ್ಚರ್ ಅಪಗ ಪುರ ಬರೊಂದ್ ಇತ್ತಿನೇ ಮಸ್ತ್ ಕಮ್ಮಿ. ಆಂಡ 2011 ಡ್ " ಒರಿಯರ್ದೋರಿ ಅಸಲ್ ಪಿಚ್ಚರ್" ಬತ್ತಿ ಬೊಕ್ಕ ನಮ್ಮ ತುಳು ಪಿಚ್ಚರ್ ಇಂಡಸ್ಟ್ರಿಗ್ ಪನೀತ್ ಜೀವ ಬತ್ತ್ಂಡ್. ಅವೆನ್ ತುಳು ಚಿತ್ರರಂಗದ ಸೆಕೆಂಡ್ ಇನ್ನಿಂಗ್ಸ್ ಪಂದೆ ಪನೋಲಿ.ಆಯಿ ಬೊಕ್ಕ ವರ್ಷಗ್ ರಡ್ಡ್, ಮೂಜಿ ಪಿಚ್ಚರ್ ಬತ್ತದ್ ಬತ್ತದ್  ಇಂಚೊಗ್ ತಿಂಗೊಲ್ ಗ್ ರಡ್ಡ್ ಮೂಜಿ ಪಿಚ್ಚರ್ ಲ  ಬರ್ಪಿನಡೆ ಮುಟ್ಟ ನಮ್ಮ ತುಳು ಚಲನಚಿತ್ರರಂಗ ಬುಳೆಂಡ್. ತುಳು ಚಲನಚಿತ್ರರಂಗ " ಕೋಸ್ಟಲ್ ವುಡ್" ಪನ್ಪಿನ ಕಡಲ ಬರಿತ ಕಮ್ಮೆನೆಡ್ ಬೇತೆ ಕಡೆಟ್ ಲ ಪುಗರ್ತೆ ಪಡೆಯರೆ ಸುರು ಆಂಡ್.

ಇಡೆ ಮುಟ್ಟ ತುಳು ಭಾಷೆ ಡ್ 117 ಪಿಚ್ಚರ್ ಆತ್ಂಡ್ ಗೆ.ನೆಟ್ಟ್ ಬಿಸತ್ತಿ ಬಾಬು,ಬಂಗಾರ್ ಪಟ್ಲೆರ್,ಗಗ್ಗರ, ಕೋಟಿ ಚೆನ್ನಯ, ಮದಿಪು, ಪಡ್ಡಾಯಿ ಉಂದು ಪುರ  ರಾಷ್ಟ್ರ ಪ್ರಶಸ್ತಿ ಪಡೆಯಿನ ಪಿಚ್ಚರುಲು. ದೇಯಿ ಬೈದೆತಿ ಗ್ ರಾಜ್ಯ ಪ್ರಶಸ್ತಿ ತಿಕ್ಕದ್ಂಡು.ಬಂಗಾರ್ ಪಟ್ಲೆರ್ 25 ನೇ ಪಿಚ್ಚರ್. ಬ್ರಹ್ಮಶ್ರೀ ನಾರಾಯಣ ಗುರು ತುಳುತ 50 ನೇ ಪಿಚ್ಚರ್. ಕರ್ಣೆ ತುಳುತ 100 ನೇ ಪಿಚ್ಚರ್.

September 8 ಪನ್ಪಿನ ಪಿಚ್ಚರ್  24 ಗಂಟೆ ದ ಉಲಯಿಡ್  ಶೂಟ್ ಮಲ್ತಿನ ತುಳು ಪಿಚ್ಚರ್. ಸುದ್ದ ಪಿಚ್ಚರ್ ಗ್ ಎಡ್ಮನೇ  ಏಷ್ಯನ್ ಫಿಲ್ಮ್ ಫೆಸ್ಟಿವಲ್ ಡ್ ಆವರ್ಡ್ ತಿಕ್ಕುದುಂಡು.ನಿರೆಲ್ ಪಿಚ್ಚರ್ ಪೂರ್ತಿ ದುಬೈ ಡ್ ಶೂಟಿಂಗ್ ಮಲ್ತಿನ ಪಿಚ್ಚರ್. ಚಾಲಿ ಪೋಲಿಲು ಜಾಸ್ತಿ ದಿನ ಪಂಡ 511 ದಿನ ಥಿಯೇಟರ್ ಡ್ (PVR) ಬಲ್ತಿನ ಪಿಚ್ಚರ್. ಉಂದು ಇಸ್ರೇಲ್ ದೇಸೋಡು ಲ ರಿಲೀಸ್ ಆಯಿನ ಸುರುತ ಪಿಚ್ಚರ್ ಗೆ. ಚಂಡಿಕೋರಿ ಉಡುಪಿ ಬೊಕ್ಕ ಕುಡ್ಲಡ್ ನೂದು ದಿನ ಪೂರ್ತಿ ಮಲ್ತ್ ದ್ಂಡು.ಸದ್ಯೋಗ್ ತುಳುಟು  ಗಿರ್ಗಿಟ್ ಜಾಸ್ತಿ ಲಾಭ ಪಡೆಯಿನ ಪಿಚ್ಚರ್. 

ಕೆ. ಎನ್.ಟೈಲರ್, ಸಂಜೀವ ದಂಡೆಕೇರಿ, ಭೋಜ ಸುವರ್ಣ ಮೊಕುಲು ಪುರ ತುಳುಟ್ ಒಂಜಿ ಕಾಲಡ್ ರೈಸಿದಿನಕುಲು..ಅಕುಲು ಪುರ ದುಂಬದುದ ಹಿರಿಯೆರ್ ಆಂಡ 2011 ರ್ದ್ ಬೊಕ್ಕ ದೇವದಾಸ್ ಕಾಪಿಕಾಡ್,ವಿಜಯ್ ಕುಮಾರ್ ಕೊಡಿಯಾಲ್ ಬೈಲ್,ನವೀನ್ ಡಿ ಪಡೀಲ್, ಬೋಜರಾಜ್ ವಾಮಂಜೂರ್,ಅರವಿಂದ್ ಬೋಳಾರ್ ತುಳು ಚಲನಚಿತ್ರ ರಂಗನ್ ಕುಡೊಂಜಿ ಬೇತೆನೆ ಪೊಸ ಮಜಲ್ ಗ್ ಪತೊಂದು ಪೋತಿನಕುಲು. 

ಕಾಲೇಜ್ ಡ್ ಇಪ್ಪುನಗ 2011 ದ ಒರಿಯರ್ದೋರಿ ಅಸಲ್ ಪಿಚ್ಚರ್ ಯಾನ್ ಕಾಲೇಜ್ ದ ದೋಸ್ತಿ ನಕ್ಲೆನ ಒಟ್ಟಿಗೆ ಟಾಕಿಸ್ ಡ್ ತುತಿನ ಸುರುತ ತುಳು ಪಿಚ್ಚರ್. ಅವ್ವ್ ಲ ಜ್ಯೋತಿ ಟಾಕೀಸ್ ಡೇ ತುತಿನಿ ಪಂದ್ ನೆನಪು. ಆಯಿ ಬೊಕ್ಕ ಹೆಚ್ಚಿನ ಪೂರ ತುಳು ಪಿಚ್ಚರ್ ತೂತೆ. ತುಳುಟ್ ಸದ್ಯೊಗ್ ಎಂಕ್ ಮಸ್ತ್ ಇಷ್ಟ ಪಂಡ ಅರವಿಂದ್ ಬೋಳಾರ್. ಅರೆನ "ಎಕ್ಕ ಸಕ" ಬೊಕ್ಕ ಅಯ್ಟ್ ಆರ್ ಮಲ್ತಿನ ಗುಣನಾಥ್ ನ  ಪಾತ್ರ ಏಪಲ ಮರೆಪರೆ ಸಾಧ್ಯನೇ  ಇಜ್ಜಿ. 

ಪರ ತುಳು ಪಿಚ್ಚರ್ ತೂಯಿಜಿಂಡಲ ದುಂಬುದ  ಸೋಕುದ ತುಳು ಪದೋಕುಲು ಕೆನರೆ ಬಾರೀ ಇಷ್ಟ ಆಪುಂಡು.ಅಯ್ಟ್ ಲ "ಪಗೆತ ಪುಗೆ" ಪಿಚ್ಚರ್ ಗ್ ಎಂ. ಕೆ ಸೀತಾರಾಂ ಕುಲಾಲ್ ಮೇರ್ ಬರೆತಿನ "ಮೋಕೆದ ಸಿಂಗಾರಿ.." ಎನ್ನ ಏಪದಲ ಮಸ್ತ್ ಇಷ್ಟದ ಪದ.ಎಂಕ್ ಪಂದ್ ಅತ್ತ್ ಹೆಚ್ಚಿನ ತುಳುವೆರೆಗ್ ಆ ಪದ ಏಪಗ್ಲ ಇಷ್ಟನೇ. ಅಂಚನೇ ಕೋಟಿ ಚೆನ್ನಯದ "ಎಕ್ಕ ಸಕ್ಕ " ಲ ಇಷ್ಟ ಆಪುಂಡು. ಸೀತಾರಾಂ ಕುಲಾಲ್ ಬರೆತಿನ "ಪಕ್ಕಿಲು ಮೂಜಿ ಒಂಜೇ ಗೂಡುಡು" ಅವ್ವ್ ಲ ಎಡ್ಡೆ ಪದ. 

1973 ದ ಕೋಟಿ ಚೆನ್ನಯ ಪಿಚ್ಚರ್ ದ ಪೂರ ಪದಕೊಲು ಬಾರೀ ಎಡ್ಡೆ ಇತ್ತ್ಂಡ್. ಅಯ್ಟ್  ಪ್ರೋ.ಬಿ.ಎ.ವಿವೇಕ್ ರೈ ಬೊಕ್ಕ ಅಮೃತ ಸೋಮೇಶ್ವರ ಪುರ ಪದ ಬರೆದ್ ಇತ್ತೆರ್. ಅಂಚನೆ ಪಿ.ಬಿ ಶ್ರೀನಿವಾಸ್ ಅಯ್ಟ್  ಬಾರೀ ಪೊರ್ಲುಡು ಪದ ಪಂತೆರ್. ಕೆಮ್ಮಲೆತ ಬ್ರಹ್ಮ, ಮೋಕುಲು ವೀರೆರ್ ಮೊಕುಲು ಶೂರೆರ್, ಜೋಡು ನಂದ ದೀಪ ಬೆಳಗ್ಂಡ್ ತುಳುವ ನಾಡ್ ದ ಗುಂಡಡ್.. ಉಂದು ಪೂರಲ ಕೋಟಿ ಚೆನ್ನಯದನೇ ಪದಕುಲು. 

ಬೇತೆ ಬೇತೆ ಮಲ್ಲ  ಗಾಯಕೆರ್ಲ ತುಳು ಭಾಷೆ ಡ್ ಪದ ಪಂತೆರ್. ಎಸ್. ಜಾನಕಿ,ಪಿಬಿ ಶ್ರೀನಿವಾಸ್, ಯೇಸುದಾಸ್,ಉದಿತ್ ನಾರಾಯಣ್,ಬಿ.ಆರ್ ಛಾಯ, ನರಸಿಂಹ ನಾಯಕ್ ಇಂಚ ಮಸ್ತ್ ಜನ ಎಡ್ಡೆ ಗಾಯಕೆರ್ ಪದ ಪಂತೆರ್. ಅಂಚನೆ 1974 ದ "ಏರ್ ಮಲ್ತಿನ ತಪ್ಪು" ಡ್ ಮಿನುಗು ತಾರೆ ಕಲ್ಪನ ಲ ಅಭಿನಯ ಮಲ್ತದ್ ಇತ್ತೆರ್. 1974 ದ ಬಯ್ಯ ಮಲ್ಲಿಗೆ ಡ್ ಪಂಡರಿಬಾಯಿ,1974 ಕಾಸ್ದಾಯೆ ಕಂಡನೆ ಡ್ ಜಯಮಾಲ, 1993 ದ ಬಂಗಾರ್ ಪಟ್ಲೆರ್ ಪಿಚ್ಚರ್ ಡ್ ಸುದಾರಾಣಿ, 1971 ದ ದಾರೆದ ಬುಡೆದಿ ಡ್ ಅಂಚನೆ ಕುಡೊಂಜಿ ಪಿಚ್ಚರ್ ಸಾವಿರಡ್ ಒರ್ತಿ ಸಾವಿತ್ರಿ ಪಿಚ್ಚರ್ ಡ್ ಲೀಲಾವತಿ, 2007 ದ ಕೋಟಿ ಚೆನ್ನಯ ಡ್ ವಿನಯ ಪ್ರಸಾದ್ ಪುರ ಅಭಿನಯ ಮಲ್ತದೆರ್.

2011 ಡ್ ಒರಿಯೋರ್ದರಿ ಅಸಲ್ ಬತ್ತಿ  ಬೊಕ್ಕ ತುಳು ನಾಟಕದ ಹೆಚ್ಚಿನ ಕಲಾವಿದೆರ್ ನಮ್ಮ ತುಳು ಚಿತ್ರರಂಗದ ಬುಲೆಪುಗ್ ಮಸ್ತ್ ಕಾರಣ ಆಯೆರ್.

ತುಳು ಪಿಚ್ಚರ್ ನನಾತ್ ಎಡ್ಡೆಡ್ ಬರೊಡು, ಅಂಚನೆ ಬೇತೆ ಚಿತ್ರರಂಗದ ಲಕನೇ ನಮಲ ಮಸ್ತ್ ಮಿತ್ತ್ ಮಿತ್ತ್ ಪೋವೋಡು ಪಂದ್ ಮಾತೆರ್ನಲಕ ಎಂಕ್ ಲ ಆಸೆ. ದಾಯೆಗ್ ಪಂಡ ದಿನೊಲ ಪಾತೆರುನ ಅಪ್ಪೆ ಭಾಷೆದ  ಕಮ್ಮೆನ ಟಾಕೀಸ್ ಡ್ ಕೆನರೆ,ಪರದೆಡ್ ಕಲಾವಿದೆರ್ನ ಅಭಿನಯದ ಒಟ್ಟಿಗೆ ತೂನಗ ಆಪಿನ ಕುಸಿಯೇ ಬೇತೆ.

ಸದ್ಯೋಗ್ ತುಳುಟ್ ಹಾಸ್ಯ ಬುರ್ದು ಬೇತೆ ಪ್ರಯೋಗ ಮಲ್ತ್ಂಡ ಅವ್ವ್ ಒಂತೆ ಗೆಂದುನಿ ಕಮ್ಮಿಯೇ. ದಾಯೆಗ್ ಪಂಡ ತುಳುವೆರ್ ಹಾಸ್ಯ ಪ್ರಿಯೆರ್.ಅಂಚಾದ್ ಕೇವಲ ಅಂಚಿನನೇ ಪಿಚ್ಚರ್ ಬರೊಂದು ಉಂಡು. ಪಿಚ್ಚರ್ ಮಲ್ಪುನಕುಲುಲ ಬೇತೆ ಪ್ರಯೋಗ ಮಲ್ಪರೆಲ ಪನೀತ್ ದುಂಬು ಪಿರ ತೂವೊಡು ಆಪುಂಡು, ದಾಯೆಗ್ ಪಂಡ ತುಳು ಚಲನಚಿತ್ರರಂಗ ಮಸ್ತ್ ಎಲ್ಯ ಇಂಡಸ್ಟ್ರಿ.ಜನ ತೂಯಿಜಿಂಡ ಪಿಚ್ಚರ್ ಮಲ್ತಿನಕ್ಲೆಗ್ ಲ ಮಸ್ತ್ ಲಾಸ್ ಆಪುಂಡು. ಆಂಡ ದುಂಬುಗು ಎಡ್ಡೆ ಎಡ್ಡೆ ಪ್ರಯೋಗ ಆದ್ ನಮನ ಚಿತ್ರರಂಗ ಬೇತೆನೇ ರೀತಿಡ್ ಎಡ್ಡೆ ಪುಗರ್ತೆ ಪಡೆಯಡ್ ಪಂದ್ ತುಳು ಚಿತ್ರದ ಅಭಿಮಾನಿ ಆದ್ ಎನ್ನ ಒಂಜಿ  ಮಲ್ಲ ಆಸೆ ಆತೆ 😊

.....................................................................................

#ಉರಲ್_ಕುರಲ್

ab pacchu

moodubidire