ಬಿಸು ಪರ್ಬದ ದಿನ ಬೂಮಿ ಅಪ್ಪೆನೇ ಮಾತೆರ್ದಲ ಪೊರ್ಲು..
ಪೊಸತ್ ಮಾತೆರೆಗ್ಲ ಇಷ್ಟ.
ಪೊಸ ವಿಷಯೊಲು ಉದಾಸೀನದ ಬದ್ಕಗ್ ಒಂಜಾತ್ ಉಲ್ಲಾಸನ್ ಪನೀತ್ ಆಂಡಲ ಕೊರ್ಪುಂಡು.
ಜೋಕ್ಲೆಗ್ ಗೊಬ್ಬುನ ಪೊಸ ಆಟದ ಸಾಮಾನ್,ಪಾಡರೆ ಪೊಸ ಅಂಗಿ,ಒಂತೆ ಮಲ್ಲಾಯಿ ಬೊಕ್ಕ ಅಮ್ಮೆರ್ ದೆತ್ತ್ ಕೊರ್ಪಿನ ಪೊಸ ಸೈಕಲ್,ದುಂಬಗ್ ನಮನೇ ಬೆಂದ್ ದ್ ಗೆತೊನುನ ಪೊಸ ಬೈಕ್,ಎಡ್ಡೆ ಸಂಬಳದ ಪೊಸ ಕೆಲಸ... ನೆಟ್ಟ್ ಪುರ ಅಕ್ಲೆನ ಅಕ್ಲೆನ ಒಂಜಾತ್ ಕುಸಿ ಏಪಾಲ ಇಪ್ಪುಂಡು.
ಖಾಲಿ ವಸ್ತುಲು ಮಾತ್ರ ಅತ್ತ್....
ಇಲ್ಲಗ್ ಅಮ್ಮ ಬರಿತ ಇಲ್ಲರ್ದ್ ಕನಪಿನ ಪೊಸ ಪುಡ್ಕೆನೆ ಪುಡ್ಕೆನೆ ನಾಯಿದ ಕುಕ್ಕುರು,ಶೋಕುದ ಎಲ್ಯ ಪುಚ್ಚೆದ ಕಿನ್ನಿ ಮಂಗು,ತಿದ್ದಿ ಕನತಿನ ಪೊರ್ಲಕಂಟ್ ದ ಕಟ್ಟದ ಕೋರಿ ಗಿಡಿಯೆ,ಊರುದ ಶೆಟ್ರೆನ ಗತ್ತ್ ದ ಕಂಬ್ಲೊದ ಪೊಸ ಎರುಕುಲು,ಟೀ ಪಾರ್ಟಿ ಕೊರ್ದು ಮಾತೆರೆನ್ಲ ಎದ್ಕೊನ್ನ ನಮ್ಮ ದೋಸ್ತಿನ ಊರುದ ಪೊಸ ಅಂಗಡಿ,ಬೈಕ್ ಬುಡರೆ ನನ ಗುಂಡಿದ ಕಿರಿ ಕಿರಿ ಇಜ್ಜಿ ಪಂದ್ ಅನಿಸಾಯಿನ ಪೊಸತ್ ಡಾಂಬರ್ ರೋಡು..... ಕೆಲವು ನಮ್ಮ ಅತ್ತ್ಂಡಲ ಅವ್ವ್ ಪೊಸಾತ್ ಪನ್ಪಿನ ಕಾರಣೊಗು ನಮ್ಮ ಮನಸ್ಸ್ ಗ್ ಒಂಜಾತ್ ಕುಸಿ.
ಉಂದು ಪೂರ ಎಲ್ಯ ಎಲ್ಯ ವಿಷಯ ಆಂಡಲ ಅಯ್ಟ್ ಕುಸಿ ಖಂಡಿತವಾದ್ಲ ಉಂಡು.
ಆಂಡ ನಮಕ್ ನನಲ ಮಸ್ತ್ ಕುಸಿ ಕೊರ್ಪಿನ,ಕುಸಿ ಕೊರಡಾಯಿನನೇ ಒಂಜಿ ವಿಷಯ ಉಂಡು.
ಅವ್ವೇ ಭೂಮಿ ಅಪ್ಪೆನ ಮಟ್ಟೆಲ್ ಬೊಕ್ಕ ನಮ್ಮ ಪೊಸ ವರ್ಷ ಬಿಸು.
ತುಳುವೆರ ಪೊಸ ವರ್ಷ,ತುಳುವೆರ ಯುಗಾದಿ ಪಂಡ ಅವ್ವ್ ಬಿಸುವೇ..
ಬಿಸು ಕಣಿ ದೀಪಿನ ಒಟ್ಟಿಗೆ.. ಪಾಯ್ಸದ ಒನಸ್ ಮಲ್ಪಿನ, ಪೊಸ ಅಂಗಿ ಕುಂಟು ಪಾಡುನ,ಪೊಣ್ಣು ಪೊಂಜೊವುಲು ಪೊಸ ಸೀರೆ ತುತ್ತುನ ಅಯ್ತ ಆಪಿನ ಒಟ್ಟಿಗೆ ಒಟ್ಟಿಗೆನೇ.. ನಮ ಒರ ಪಿದಯಿ ಬತ್ತ್ ದ್ ನಮ್ಮ ಪ್ರಕೃತಿನ್ ಲ ಒರ ಕಣ್ಣ್ ನಿಲಿಕೆ ತುವೊಡು
ನಿಜವಾಯಿನ ಮನಸ್ಸ್ ಗ್ ಉಲ್ಲಾಸ ಕೊರ್ಪಿನ ಪೊಸತ್ ವಿಷಯ ಅರಲುನು ಏಪಲ ನಮ್ಮ ಬೂಮಿ ಅಪ್ಪೆನ ಮಟ್ಟೆಲ್ ಡೆ.
ನಿಕ್ಲೆ ಪನ್ಲೆ.. ನಮ್ಮ ಬೂಮಿ ಅಪ್ಪೆರ್ದ್ ಪೊರ್ಲು ಏರಾಂಡಲ ಇಪ್ಪರೆ ಸಾಧ್ಯನಾ..?
ಅವ್ವೆತ್ತೋ ಕಾಡ ಪೂ ಅರಲುನು,ಗೆಲ್ಲ್ ಗೆಲ್ಲ್ ಡ್ ತೆಗ್ಲ್ ತೆಗುಲುನು,ಲತ್ತ್ ಕಕ್ಕು ಪರ್ಂದ್ ಕುಕ್ಕು ಮರ ದಿಂಜ ನೇಲುನು,ಕಲ್ಲಿಗೆ ಪೆಲಕಾಯಿ ಆವರೆ ಅಟ್ಟನೆ ಮಲ್ಪುನು,ಕೊಯ್ಯರೆ ಆವಂದಿನಾತ್ ಎತ್ತರಡ್ ಇಪ್ಪುನ ಪೆಜಕಾಯಿ ಕಡೆಕ್ ಪರ್ಂದ್ ಆದ್ ತೊಟ್ಟು ತಾಲ್ದೆ ತಿರ್ತ್ ಬೂರುನು,ಪುನರ್ ಪುಳಿ ಪರ್ಂದ್ ಆನಗ ಅಯ್ತ ಮರಟ್ ಏಪಲ ಮಂಗನಕ್ಲೆನನೇ ಕಾರ್ಬಾರ್ ನಡಪುನು,ತಾರಿ ಮರಟ್ ಇತ್ತಿನ ಇರೋಲ್ ಸಾದಿ ಬರಿಕ್ಕ್ ಬತ್ತ್ ದ್ ಅಯ್ತೊಲಯಿದ ನೀರ್ ನಮ್ಮ ಬಾಯಿ ತಂಪು ಮಲ್ಪುನು,ರೆಂಜಿರ್ದ ಪೂ ಮರತ ಅಡಿಟ್ ಬೊಳ್ಳಿದ ರಂಗೋಲಿ ಪಾಡುನು,ಕಕ್ಕೆ ಪೂ ಮರ ನಿಲಿಕೆ ಬಂಗಾರ್ದ ಸಿಂಗಾರೊಡು ಅಯ್ತ ಆಪುನು,ಬಿಸು ಪರ್ಬದ ಪಾಯಸ್ ಗ್ ಒಂಜಾತ್ ಲತ್ತ್ ಬೀಜ ಮರಟ್ಟ್ ನಮಕಾದೇ ಕಾಪುನು.... ಉಂದು ಪೂರ ಆಪಿನಿ ಉಂದೇ ಸಂಧರ್ಬೊಡು.
ಅಂದ್.. ಉಂದು ನಮರ್ದ್ ಜಾಸ್ತಿ ಬೂಮಿ ಅಪ್ಪೆಗೇ ಪೊಸ ವರ್ಷದ ಸಂಭ್ರೊಮ.
ನಮ ತುಳುವೆರ್ ಪಂಡ ಪ್ರಕೃತಿ ಆರಾಧಕೆರ್.ದೈವ ದೇವೆರೆನ ದಯೆಟ್ಟು ಬಾರೀ ಶೋಕುದ ಪ್ರಕೃತಿ ನಮಕ್ ತಿಕ್ಕ್ ದುಂಡು.ಬೂಮಿ ಅಪ್ಪೆಲ ವರ್ಷದ ಸುರುಕ್ಕೇ ಸುರುತ ಪಚ್ಚೆ ಸೀರೆ ತುತ್ತುದು ಪೊಸ ರೀತಿಟ್ ಕುಸಿ ಕುಸಿಟ್ ಅಯ್ತ ಆನಗ ನಮ್ಮ ಅಲೆನ ಪೊರ್ಲು ತೂದು ಕಣ್ಣು ಸಂಪು ಮಲ್ಪೊಡು.
ನಮ್ಮ ತುಳುನಾಡ್ದ ಬೂಮಿ ಅಪ್ಪೆನ ಮಟ್ಟೆಲ್ ಅಂಚನೇ ಏಪಲ ಒರಿಯಾಡ್.
ಗತ್ತ್ ದ ಕಟ್ಟದ ಕೋರಿ ನನಾತ್ ಗತ್ತ್ ಡೆ ಕೆಕ್ಕಿಲ್ ದೆರ್ತ್ ದ್ ಕೆಲೆಪೊಡು,ಕಂಬ್ಲೊದ ಎರುಕುಲು ಪೊಯಿನಲ್ಪ ಒಂಜಾತ್ ಮೆಡಲ್ ಹಾಕ್ದ್ ಊರುಗು ಪುದರ್ ಕನವೊಡು,ರಾತ್ರೆದ ಯಕ್ಷಗಾನ ದುಂಬುದ ಲಕನೆ ರೈಸೊಡು,ದೈವ ದೇವೆರ್ ನಾಗ ದೇವೆರ್ ನ ಮಿತ್ತ್ ದ ನಂಬಿಕೆ ಪೋಡಿಗೆ ಅಂಚನೆ ಒರಿಯೊಡು,ಬೂರುದ ಹಿಬುಲ ಬೆಲ್ಲ ತಾರಾಯಿದ ಪೇರ್ ಡ್ ಜ್ಯೂಸ್ ಆವರೆ ಒರಿಯೊಡು,ಕಂಡ ನೇಜಿ ಉರಲ್ ಕುರಲ್ ಪಾರ್ದನ ಲ ಒರಿಯೊಡು,ನಮ್ಮ ಪರ್ಬ ಆಚಾರ ವಿಚಾರೊಲು ನನ ದುಂಬುಗುಲ ಒರಿಪಾವುನ ಬೇಲೆ ಆವೊಡು,ಮಾತೆರ್ನ ಆಸೆದ ಲಕನೇ ನಮ್ಮ ತುಳು ಎಡ್ನನೆ ಪರಿಚ್ಛೇದಗ್ ಸೇರ್ದ್ ಮಾನಾದಿಗೆ ಗೆತ್ತೊನೊಡು,ನಮ ತುಳುವೆರ್ ಪನ್ಪಿನ ಅಭಿಮಾನ ನಮ್ಮ ಉಡಲ್ಡ್ ನನಲ ಇಂಚನೇ ಇಪ್ಪೊಡು.. ಮಾತೆರ್ದ್ ಲ ಹೆಚ್ಚಾದ್ ನಮ್ಮ ಭೂಮಿ ಅಪ್ಪೆ ಏಪಲ ಸುಕೊಟ್ಟು ಇಪ್ಪೊಡು.
#ಎನ್ನ_ಮಾತ_ಮೋಕೆದ_ತುಳುವೆರೆಗ್ಲ_ಬಿಸು_ಪರ್ಬದ_ಎಡ್ಡೆಪುಲು ❤️.ನಿಕ್ಲೆಗ್ ಮಾತೆರೆಗ್ಲ ನಂಬಿನ ದೆವ್ವ ದೇವೆರ್ ಎಡ್ಡೆ ಮಲ್ಪಡ್ 😊🙏
ಪ್ರೀತಿ ಉಪ್ಪಡ್.. ಮೋಕೆ ಉಪ್ಪಡ್..
ಬರವು - ಪಚಂತು ಬೆದ್ರ.
.....................................................................................
#ಉರಲ್_ಕೊರಲ್
ಪಚಂತು - ಬೆದ್ರ
(fb - ab pacchu)
[https://phalgunikadeyavanu.blogspot.com]
Comments
Post a Comment