ಬೊಲ್ಲದ ತಾರಾಯಿ..
ಕೆಲವೆರೆಗ್ ಬರ್ಸ ಪಂಡ ಬಾರೀ ಇಷ್ಟ,ಕೆಲವೆರೆಗ್ ದಾದನ ಬರ್ಸ ಪಂಡ ಅವ್ವ್ ಒಂತೆ ಪನೀತ್ ಕಷ್ಟ.ಪಿದಯಿಡ್ ರಡ್ಡ್ ಪನಿ ಕುಡ್ತಿ ಕೂಡ್ಲೆ ರಪ್ಪ ಒಲಯಿ ಪೋದು ಕುಲ್ಲುದು ಬುಡ್ಪೆರ್.
ಆಂಡ ತುಳುನಾಡ್ ದ ಈ ಬರ್ಸದ ಪೊರ್ಲು ಬೊಕ್ಕ ಅಯ್ತ ಅವ್ವೊಂಜಿ ಐಸಿರ ಬೇತೆನೇ ಬುಡ್ಲೆ .ಬೂಮಿಅಪ್ಪೆ ಬರ್ಸದ ಪಸೆಗ್ ಪಚ್ಚೆ ಆವೊಂದು ಪೋನಗ.. ಅವ್ವ್ ಏತೋ ದುಂಬುದ ನೆಂಪುಲು,ಅವ್ವ್ ಏತೋ ಕಥೆಕುಲು ಅಂಚನೇ ಒರಾನೇ ನೆನಪಾಪುಂಡು ಮಾತೆರೆಗ್ಲ.
ಅಂದ್ ತುಳುವೆರೆಗ್ ಬರ್ಸ ಏಪಲ ಇಷ್ಟನೇ.
ಜೋಕ್ಲೆಗ್ ಚಂಡಿ ಆವೊಂದು ಗೊಬ್ಬರೆ ಪಿರಿ ಪಿರಿ ಬರ್ಸನೇ ಬೋಡು.ಬೆನ್ನಿದಕ್ಲೆಗ್ ಏತ್ ಬರ್ಸ ಬೋಡಾ ಆತೇ ಬರ್ಸ ಇತ್ತ್ಂಡ ಸಾಗುವಳಿಗ್ ಬಾರೀ ಲಾಯ್ಕ್.ಕಂಡದ ಕೈಯ್ ಕೊಯ್ನಗ ಪಾರೊಂದು ರಾವೊಂದು ಬತ್ತ್ ದ್,ಬುಲೆತ ಒಟ್ಟಿಗೆ ಬಂಗಾರ್ ಬದ್ಕ್ ನ್ಲ ಹಾಲ್ ಮಲ್ಪಿನ ಬರ್ಸ ನಿಜವಾದ್ಲ ಆವ್ವ್ ಮಾತ್ರ ತಡೆವೊನರೆ ಆವಂದಿನನೇ ಬಂಙನೇ.
ಆಂಡಲ ಕೆಲವೆರೆಗ್ ಬೊಲ್ಲ ಬರ್ಸ ಪಂಡನೆ ಬಾರೀ ಇಷ್ಟ.ಇನಿ ನಮ ಅಕ್ಲೆನ ಬಗ್ಗೆ ಬೊಕ್ಕ ಬೊಲ್ಲದ ಬಗ್ಗೆನೇ ಒಂತೆ ಞಕ್ಕ್ ಞೈ ಮಲ್ಪುಗ.
ಬೊಲ್ಲ ಬರ್ಸ ದಾಯೆಗ್ ಇಷ್ಟ ಪಂಡ ತುದೆಟ್ ಬೊಲ್ಲ ಏರ್ದ್ ಅಯ್ಟ್ ಬರ್ಪಿನ ತಾರಾಯಿ ಪತ್ತರೆಗೋಸ್ಕರ ಬೊಲ್ಲ ಬರ್ಸ ಕೆಲವೆರೆಗ್ ಇಷ್ಟ.
ಬೊಲ್ಲಡ್ ತಾರಾಯಿ ಪತ್ತುನ ಉಮೇದ್ ಇತ್ತಿನಕ್ಲೆಗ್ ಪನೀತ್ ಪಿರಿ ಪಿರಿ ಬರ್ಸ ಓಲು ಯಾವುಂಡು. ಜೋರು ಬರ್ಸ ಬತ್ತ್ಂಡನೇ ಇಲ್ಲಗ್ ನಾಲ್ ತಾರಾಯಿ ಆಂಡಲ ಎಂಚಲ ಒಟ್ಟು ಆಪುಂಡು.
ಅಂಚ ಪಂದ್ ಇಲ್ಲಡ್ ತಾರಾಯಿ ಇಜ್ಜಿ ಪಂದ್ ಬೊಲ್ಲದ ತಾರಾಯಿ ಪತ್ತರೆ ಪೋಪಿನಿ ಅತ್ತ್. ಇಲ್ಲಡ್ ತಾರಾಯಿದ ಮರ ಇತ್ತಿನಕುಲ್ಲ ಪೋಪೆರ್,ಇಜ್ಜಂದಿನಕುಲ್ಲ ಬೊಲ್ಲ ಬನ್ನಗ ತುದೆ ಬರಿ ಒಂಜಿ ಘಳಿಗೆ ಪುರ್ಸೊತ್ತು ಮಲ್ತೊಂದು ಪೋಪೆರೇ..
ಅವ್ವ್ ಒಂಜಿ ದಾದನ ಗಮ್ಮತ್.ತೋಡು,ತುದೆಕುಲು ಉರ್ಕುದು ಸೊರ್ಕುದು ಅರೆಬಾಯಿ ಕೊರೊಂದು ಪಾರೊಂದು ಲಾಗಿಯೊಂದು ಕೆಂಪು ಕೆಂಪು ಆದ್ ಬನ್ನಗ,ಆ ಕಲಂಕ್ ನೀರ್ ದ ಮಿತ್ತ್ ಡ್ ಮಿಂದೊಂದು ಅಲಂಕೊಂದು ಬರ್ಪಿನ ತಾರಾಯಿನ್, ಒಂಜಿಲ ತಪ್ಪಾದ್ ಪೋವಂದಿಲಕ ಅಡ್ಡ ಪಾರ್ದ್ ನಮ್ಮ ಚೀಲದುಲಯಿ ದಿಂಜಾವುನ ಆ ಕುಸಿಯೇ ಬೇತೆ.
ತುಳುನಾಡ್ ದ ಜವನೆರ್ಗ್ ಮಾತ್ರ ಅತ್ತ್,ಪ್ರಾಯದ ಪೆರಿಯಾಕುಲು ಲ ಕುಡೋರ ಜವನೆರ್ ಆವರೆ.. ಬೊಲ್ಲ ಬರ್ಸ ಬರೋಡೆ.
ಮರಿಯಾಲದ ಸುರುಟು ತೆಡಿಲ್ ಬನ್ನಗ ಕೆಲೆವೆರೆಗ್ ಕಲಲಾಂಬು ನೆಂಪಾಪುಂಡು,ಬರ್ಸ ಬತ್ತ್ ದ್ ಪಾಡಿದ ಬೆಜಕರೆ ಕುರಿನಗ ಕೆಲವೆರೆಗ್ ಬೊವ್ವ್ ಲಾಂಬು ನೆಂಪಾಪುಂಡು,ಗುಡ್ಡೆದ ನೀರ್ ತೋಡು ಸೇರ್ನಗ ಕುಡೊಂತೆ ಜನಕ್ಕ್ ರಾತ್ರಿ ತೂಟೆ ಕಟ್ಟೊಂಡು ಕತ್ತಿಡ್ ಮೀನ್ ಹಾಕುನ,ದೆಂಜಿ ಗುದ್ದುನ ಉಬೇರ್ ದ ಉಮೇದ್ ಬರ್ಪುಂಡು,ತೋಡು- ತುದೆದ ಪರಪುನ ನೀರ್ ಕಲಂಕ್ ಆನಗ ಕೆಲವೆರೆಗ್ ಗಾಳ ಪಾಡುನ ತೊಡು ಹೆಚ್ಚಾಪುಂಡು.ಆಂಡ ಬೊಲ್ಲ ಬರ್ಸ ಬತ್ತ್ ದ್ ತುದೆ ಬರಿರ್ದ್ ಹೆಚ್ಚಿನಕುಲು ಇಲ್ಲದುಲಯಿ ಸೇರ್ನಗ... ಕೆಲವೆರೆಗ್ ಮಾತ್ರ ಬೊಲ್ಲದ ತಾರಾಯಿಯೇ ಲೆಕ್ಕರ್ದ್ ಜಾಸ್ತಿ ಆ ಟೈಂಡ್ ನೆಂಪಾಪುಂಡು.
ಜೋರು ಬರ್ಸ ಬನ್ನಗ ತುದೆ ಬರಿ ಇತ್ತಿನ ತಾರಾಯಿದ ಮರರ್ದ್ ತಾರಾಯಿ ತೊಟ್ಟು ಕಡ್ತೊಂದು ಪರಪುನ ನೀರ್ ಗ್ ಬುರುಂಡು. ಬೇತೆ ಸಮಯಡ್ ಲ ಬೂರುಂಡು ಆಂಡ ಅಪಗ ಬೂರಿನ ತಾರಾಯಿ ತುದೆಟ್ಟ್ ಇಪ್ಪುನ ಬಲ್ಲೆಡೆ ತಿಕ್ಕ್ ದ್ ಬೂರುದು ಸರಾಗೊಡು ನೀರ್ ಡ್ ಮೀಂದೊಂದು ಪೋಪುಜಿ.ಕೆಲವೊಂಜಿ ಮಾತ್ರ ಬಲ್ಲೆದ ಕೈಗ್ ತಿಕ್ಕ್ ದ್ ಬೂರಂದೆ ಮಿಂದೊಂದು ಪೋಪ. ಆಂಡ ಅವ್ವ್ ಮಸ್ತ್ ಕಮ್ಮಿಯೇ.
ಏಪ ಮರಿಯಾಲಡ್ ಬೊಲ್ಲ ಬರ್ಸ ರಾವು ಕೊರೊಂದು ಬರ್ಪುಂಡ ಆಪಗ ಈ ನೀರ್ ಇಪ್ಪುನ ಎಡ್ಡೆ ತಾರಾಯಿಲು ತಿರ್ತ್ ತುದೆತ ನೀರ್ ಗ್ ಬೂರುದು ಒಲ್ಪಲ ಉಂತಂದೆ,ಸೀದಾ ಆ ಒಯ್ಲ್ ದ ರಬೊಸೊಗು ಸರ್ತ ಪೋವೊಂದೇ ಇಪ್ಪುಂಡು. ಆಪಗನೇ ನಮಕ್ ಒರಕ್ಕೇ ದಿಂಜ ತಾರಾಯಿ ಪತ್ತರೆ ತಿಕ್ಕುನಿ.
ಬೊಲ್ಲಡ್ ಬರ್ಪಿನ ತಾರಾಯಿ ಪತ್ತರೆಲ ಒಂಜಿ ನ್ಯಾಕ್ ಉಂಡು.ಸೀದಾ ಪೋದು ತುದೆ ಬರಿಟ್ ಉಂತುಂಡ ತಾರಾಯಿ ನಮ್ಮ ಚೀಲಗ್,ನಮ್ಮ ಕೈಗ್ ಬತ್ತ್ ದ್ ಬೂರುಜಿ.
ಅಯ್ಕ್ ಒಂಜಿ ಹತ್ಯಾರ್ ಬೋಡಾಪುಂಡು.ಮುಖ್ಯವಾದ್ ಉದ್ದದ ದೊಂಟಿ ಒಂಜಿ ಇತ್ತ್ಂಡ ಯಾವು.
ಈ ಉದ್ದದ ದೋಂಟಿಡ್ ಬೊಲ್ಲದ ನೀರ್ ಡ್ ಪೋಪಿನ ತಾರಾಯಿನ್ ಅಡ್ಡ ಪಾರ್ದ್ ಬರೀಕ್ ಕನತ್ಂಡ ಆಂಡ್,ಬೊಕ್ಕ ತಾರಾಯಿ ನಮ್ಮ ಚೀಲದ ಉಲಯಿಯೇ.
ಕೆಲವೆರ್ ಈ ಕುಕ್ಕು ಕೊಯ್ಪಿನ ದೋಂಟಿನೇ ನೆಕ್ಕ್ ಪತ್ತೊಂದು ಪೋಪೆರ್. ನೆಟ್ಟ್ ತಾರಾಯಿ ಪತ್ತರೆ ಬಾರೀ ಸುಲಬ. ನಿಕ್ಲೆಗ್ ಗೊತ್ತಿಪ್ಪು ಕುಕ್ಕು ಕೊಯ್ಪಿನ ದೋಂಟಿದ ಕೊಡಿಟ್ ಒಂಜಿ ಕುಕ್ಕು ತಿರ್ತ್ ಬೂರಂದಿಲಕ ಎಲ್ಯ ಕುರ್ಕಿಲದಂಚಿನ ಚೀಲಲ ಇಪ್ಪುಂಡು. ಅಂಚಿನ ದೊಂಟಿ ಪತ್ತೊಂದು ಪೋಂಡ ಈ ಬೊಲ್ಲಡ್ ಬರ್ಪಿನ ತಾರಾಯಿ ಪೂರಲ ಸೀದಾ ಬತ್ತ್ ದ್ ದೋಂಟಿದ ಆ ಚೀಲೊಡೇ ತಿಕ್ಕ್ ದ್ ಬೂರುಂಡು.
ಇಂಚಿನ ದೋಂಟಿ ಇತ್ತ್ಂಡ ತುದೆದ ಬರೀಟ್ ಉಂತೊಂದು ತಾರಾಯಿ ಪತ್ತುನ ಬದಲ್ ಗ್ ಮಲ್ಲ ಸಂಕದ ಮಿತ್ತ್ ಉಂತುದೇ ಬಾರಿ ಆರಾಮೊಡು ಸಂಕದ ತಿರ್ತ್ ಡ್ ಪೋಪಿನ ಪೂರ ತಾರಾಯಿನ್ಲ ಮಿತ್ತ್ ಒಯ್ತ್ ದ್ ಪಾಡೋಲಿ. ದಾಯಿಗ್ ಪಂಡ ಅಪಗ ನಮಕ್ ಸಂಕದ ಮಿತ್ತ್ ಡೆ ಅಂಚಿ ಇಂಚಿ ಪೋದ್ ಇಡೀ ತುದೆನ್ ಆ ಬರಿರ್ದ್ ಈ ಬರಿ ಮುಟ್ಟ ಫುಲ್ ಕವರ್ ಮಲ್ಪರೆ ಆಪುಂಡು,ಅಂಚಾದ್ ಇಂಚಿನ ದೋಂಟಿ ಇತ್ತ್ಂಡ ನಮಕ್ ಲೆಕ್ಕ್ ರ್ದ್ ಜಾಸ್ತಿಯೇ ತಾರಾಯಿ ಪತ್ತೊಲಿ.
ಕೆಲವೆರ್ ಇಂಚ ತಾರಾಯಿ ಪತ್ತ್ ದ್ ಅವೆನ್ ಬೊಕ್ಕ ಮಾರ್ದ್ ಎಡ್ಡೆ ಕಾಸ್ ಲ ಮಲ್ಪುವೆರ್. ಇತ್ತೆ ಅಂತು ಒಂಜಿ ಮಲ್ಲ ತಾರಾಯಿ ಗ್ ಮುಪ್ಪ,ನಲ್ಪ ರೂಪಾಯಿಲ ಆತ್ಂಡು.ನಮ ತುಳುವೆರೆಗ್ ಅಂತು ತಾರಾಯಿ ಮಾತೈಕಲ್ಲ ಬೋಡೇ. ನಮ್ಮ ಅಟ್ಟಿಲ್ ಡ್ ತಾರಾಯಿ,ತಾರಾಯಿದ ಎಣ್ಣೆ ನಮಕ್ ಉರ್ಪೆಲ್ ಅರಿತಾತೇ ಮುಖ್ಯ ಆಯಿನವು. .
ಕೆಲವೆರ್ ಎಡ್ಡೆ ಬೊಲ್ಲ ಇತ್ತ್ಂಡ ಒಂಜೇ ದಿನ ನೂದು ತಾರಾಯಿ ಪತ್ತಿನಲ ಉದಾರಣೆ ನಮ್ಪಲ್ಪ ಉಂಡು.ಬೊಲ್ಲಡ್ ತಾರಾಯಿ ಪತ್ತ್ ದ್ ಅವೆನ್ ದಿಂಜಾವೊಂದು ಪೋವರೆ ಚೀಲ ಕನತಿನಕುಲು, ಕಂಡಾಪಟ್ಟೆ ತಾರಾಯಿ ತಿಕ್ಕ್ ದ್ ಅಕೇರಿಡ್ ರಿಕ್ಷಾ, ಮಿನಿ ಟೆಂಪೋ ಪುರ ಮಲ್ತೊಂದು ಅಯ್ಟೇ ತಾರಾಯಿ ಪತೊಂದು ಪೋತಿನಲ ಬೋಡಾಯಿನಾತ್ ಸರ್ತಿ ಆತ್ಂಡ್ .ಕೆಲವೊರ ಜಾಸ್ತಿ ತಿಕ್ಕಂದೆ ರಡ್ಡ್ ಮೂಜಿ ತಾರಾಯಿ ಪತೊಂದು ಪೋತಿನಲ ಉಂಡು, ಆಂಡ ಖಾಲಿ ಕೈಟ್ ಪೋಪಿನ ಬಾರೀ ಕಮ್ಮಿಯೇ.ಕೆಲವೆರೆಗ್ ಅಂತು ಮರಿಯಾಲಡ್ ಬೊಲ್ಲದ ತಾರಾಯಿ ಪತ್ತುನನೇ ಮಲ್ಲ ಬೇಲೆ.
ಬೊಲ್ಲಡ್ ತಾರಾಯಿ ಮಾತ್ರ ಅತ್ತ್ ಬೋಡಾಯಿನಾತ್ ಪೆಲಕಾಯಿ,ಬಾರೆದ ಪರ್ಂದ್ ದ ಕೈಲ್,ನೆಕ್ಕರೆ ಕುಕ್ಕು,ಕಾಟ್ ಕುಕ್ಕಲ ಇಂಚಿನ ಪುರಲ ಬರ್ಪುಂಡು.. ಕೆಲವೆರ್ ಅವೆನ್ಲ ಪತ್ತುವೆರ್. ಅವೆರ್ದ್ ಲ ಒರೋರ ಕಾಡ್ ದ ಮಲ್ಲ ಮಲ್ಲ ಎಡ್ಡೆ ಜಾತಿದ ಮರಕುಲು ತುದೆಕ್ಕ್ ಮಗುರ್ದ್ ಅವ್ವ್ ಲ ಬೊಲ್ಲಡ್ ಬರ್ಪಿನ ಉಂಡು. ಕೆಲವೆರ್ ತಂಕದಕುಲು ಅವೆನ್ಲ ಪತ್ತುವೆರ್.
ಮಲ್ಲ ಮಲ್ಲ ಮರಕ್ಲೆನ್ ಅಡ್ಡ ಪಾಡರೆ ಬೊಲ್ಲಡ್ ಎಡ್ಡೆ ಮೀಂದರೆಲ ತೆರಿದ್ ಇಪ್ಪೊಡು. ಸೊಂಟಗ್ ಒಂಜಿ ಉದ್ದದ ಗಟ್ಟಿದ ಬಲ್ಲ್ ಕಟ್ಟೊಂದು ಬೊಲ್ಲದ ತುದೆಟ್ ಮೀಂದೊಂದು ಪೋದು ಅವೆನ್ ಬೊಲ್ಲಡ್ ಬರೊಂದು ಇಪ್ಪುನ ಮರಕ್ಕ್ ಕಟ್ಟುವೆರ್. ಆ ಬಲ್ಲ್ ದ ಬೊಕ್ಕೊಂಜಿ ಕೊಡಿ ಒವ್ವಾಂಡಲ ಬರೀಟ್ ಇಪ್ಪುನ ಮಲ್ಲ ಮರಕ್ಕ್ ದುಂಬೆ ಕಟ್ಟ್ ದ್ ಇಪ್ಪುವೆರ್ ಅಂಚಾದ್ ಸುಲಬ ಡ್ ಬೊಲ್ಲಡ್ ಪೋವೊಂದು ಇಪ್ಪುನ ಮರ ಸೈಡ್ ಗ್ ಬತ್ತ್ ದ್ ಒಂದುಂಡು.ದುಂಬು ಪುರ ಇಂಚ ಮರ ಪತ್ತುದು ಕಾಸ್ ಮಲ್ತಿನಕುಲು ಏತೋ ಜನ ಉಲ್ಲೆರ್ ಬುಡ್ಲೆ.
ಇತ್ತೆ ನಮ್ಮಲ್ಪ ದಿನಾಲ ಬರ್ಸನೇ. ಫಲ್ಗುಣಿದ ನೀರ್ ಲ ಕಲಂಕ್ ಆವೊಂದು ಬೈದ್ಂಡ್,ಬೊಲ್ಲಲ ದಿನೊರ್ದು ದಿನಕ್ಕ್ ನಿದಾನೊಡು ಎರ್ಕೊಂದೇ ಬರೊಂದು ಉಂಡು.ದುಂಬಗ್ ಎಡ್ಡೆ ಸೊರ್ಕುದ ಬೊಲ್ಲ ಬನ್ನಗ ನಮ್ಮ ಜವನೆರ್ಗ್ ಕುಡೊರ ಬೊಲ್ಲದ ತಾರಾಯಿ ಖಂಡಿತವಾದ್ಲ ನೆನಪಾವರೆ ಉಂಡು.
ಇತ್ತೆ ಪುರ ಬೊಲ್ಲಡ್ ತಾರಾಯಿ ಪತ್ತಿಜೆರ್ಡಲ " ಈ ಒಲಾಂಡಲ ಬೊಲ್ಲಡ್ ತಾರಾಯಿ ಪತ್ತರೆ ಪೋ.." ಪನ್ಪಿನ ಪಾತೆರ ಒಂಜಿ ನಮ್ಮ ತುಳುನಾಡ್ ನನಲ ಅಂಚನೇ ಒರಿದ್ ಪೋತುಂಡು. ಪಂಡ ಸರಿಕಟ್ ಬೇಲೆ ಮಲ್ಪರೆ ಬತ್ತಿಜಿಂಡ,ಒವ್ವ್ ಬೇಲೆ ಲ ಮಲ್ಪರೆ ಇಜ್ಜಿಂಡ ಅಂಚ ಒಂಜಿ ಪಾತೆರ ಪನ್ಪೆರ್.ಆಂಡಲ ಅಂಚ ಪಂಡಿಲಕ ಬೊಲ್ಲಡ್ ತಾರಾಯಿ ಪತ್ತುನ ಮಾತ್ರ ಆತೊಂಜಿ ಸುಲಬದ ಬೇಲೆ ಖಂಡಿತವಾದ್ಲ ಅತ್ತ್.
ಪಂಡಿಲಕ ನಿಜವಾದ್ಲ ಊರುಡು ಇತ್ತೆ ಏರೆಗ್ಲ ದುಂಬುದಲಕ ತಾರಾಯಿ ಪತ್ತುನ ಆತೊಂಜಿ ಉಮೇದ್ ಇಜ್ಜಿ,ಆಂಡಲ ಪೆರಿಯಾಕ್ಲೆಗ್ ಅವ್ವೊಂಜಿ ಗಮ್ಮತ್ ಕಡ್ತೊನರೆ ಮನಸ್ಸ್ ಲ ಇಜ್ಜಿ. ಇಲ್ಲಡ್ ಏತೇ ತಾರಾಯಿ ಇತ್ತ್ಂಡಲ ಒಂಜಾಂಡಲ ಬೊಲ್ಲದ ತಾರಾಯಿ ಅಡ್ಡ ಪಾಡ್ಜಿಂಡ ಅಕ್ಲೆಗ್ ಸಮಾಧಾನ ಆಪುಜಿ.
ದುಂಬು ಮಲ್ಲಕುಲು ನೈಲಾಂಬು,ಪೆರ್ಗೆಲ್ ಲಾಂಬು,ಬೊವ್ವ್ ಲಾಂಬು ಪೆಜ್ಜರೆ ಪೋನಗ.. ಕಲಲಾಂಬು ಗರ್ಪರೆ ಪೋನಗ, ಬೊಲ್ಲಡ್ ತಾರಾಯಿ ಪತ್ತುನಗ,ಕಲಂಕ್ ನೀರ್ ಗ್ ಗಾಳಗ್ ನಕ್ಕರು ಪಾರ್ದ್ ಮೀನ್ ಪತ್ತುನಗ,ಉಬೇರ್ ದ ಮೀನ್ ನ್ ಕತ್ತಿದ ಬೆರಿಟ್ ಗುದ್ದುನಗ..ದೆಂಜಿನ್ ಕತ್ತಿಡೇ ಮೆಲ್ಲ ಕೊಡಪುನಗ....... ಯಾನ್ಲ ಚೀಲ ಪತೊಂದು ಅಕ್ಲೆನ ಪಾಸಾಡಿ ಪೋದು ಪೂರವೆನ್ಲ ಕಣ್ಣ್ ಬಾಯಿ ಬುರ್ದು ತೂವಂದು ಇತ್ತೆ.ಅಪಗ ಒಂಜಿ ಏತ್ ಉಲ್ಲಾಸ್ ಇತ್ತ್ಂಡ್ ಉಂದು ಪುರ ಗಮ್ಮತ್ ಡ್.ಅವ್ವ್ ಮರಿಯಾಲದ ನೆಂಪು ಪುರ ಇತ್ತೆಲ ತುದೆಟ್ ಬರಿಟ್ ಉಂತುದು ಜೋರು ಬೊಲ್ಲ ಅಯ್ತಾತೆ ಪೋಪಿನವೆನ್ ತೂನಗ ಅಂಚನೇ ಒರ ರಪ್ಪಂದ್ ಪಾಸ್ ಆದ್ ಪೋಪುಂಡು.
ದಾದಲ ಪನ್ಲೆ ತುಳುನಾಡ್ ದ ನೆನಪುದ ಕಮ್ಮೆನೊಲು ಏಪಗ್ಲ ಪಕ್ಕೊಗು ಅಡರಂದಿನವು...
.....................................................................................
#ಉರಲ್_ಕುರಲ್
ಪಚಂತು-ಬೆದ್ರ.
(photo-internet)
Comments
Post a Comment